عربيات سعرها زاد مرتين في أسبوع واحد!

هل الدولار هو السبب الوحيد؟ في رأيي لأ.

السوق خايف أحسن الدولار يطير!

بعض التجار بيرفعوا الأسعار تحسبا لدولار لسه ما وصلش للسعر اللي بيحسبوا عليه.

الدولار تحت ضغط بسبب توترات المنطقة، واحتمالات التصعيد، وفاتورة الاستيراد والطاقة والالتزامات الخارجية.

ومع الحديث عن احتمال تدخل مصر عسكريا لحماية السعودية، قلق المستثمر الأجنبي ممكن يزيد. والأموال الساخنة ممكن تخرج بسرعة، فتزود الطلب على الدولار. لكن فيه طلب كمان من المستوردين وسداد الالتزامات.

نرجع للعربيات.

التاجر مش دايما بيسعّر على أساس اشترى بكام، إنما على أساس هيدفع كام عشان يعوض البضاعة. وده اسمه اقتصاديا تكلفة الإحلال.

يعني ممكن عربية اتشرت بدولار قديم، تتباع بسعر محسوب على دولار أعلى متوقع.

وهنا المشكلة: التوقعات بتتحول لزيادات حقيقية قبل ما تحصل الزيادة المتوقعة.

وده بيظهر كمان في بعض السلع الغذائية والمشروبات.

فيه فرق بين تاجر بيحمي قدرته على تعويض مخزونه، وتاجر بيبالغ من غير مبرر.

والمدهش إن الأسعار بتلحق الدولار بسرعة لما يرتفع، لكن مش بالضرورة تنزل بنفس السرعة لما يستقر أو ينخفض.

ده مش معناه إن موجة تضخم عامة بدأت، لكنه ضغط إضافي على المستهلك.

المواطن مش بيتعامل مع شاشات البنوك، هو بيدفع في السوبر ماركت والصيدلية ومحطة البنزين.

ليه المواطن يدفع تمن ارتفاع الدولار المتوقع بسرعة، ويستنى عشان يستفيد من أي انخفاض فعلي؟